فضفضه

آخر تحديث : الأربعاء 17 فبراير 2016 - 12:18 صباحًا
2016 02 17
2016 02 17

بقلم/ الكاتبة رضوى ابراهيم جبت الدبدوب يا كوكو والسلسله الانفينتي عيد الحب سواء المصري 4 نوفمبر أو عيد الحب العالمي 14 فبراير يجي من هنا … والحياه تبقى حمرا … ورود حمرا دباديب حمرا … والجديد السلسله الانفنتي … واجب لابد منه! … وبعد لما اليوم يعدي عادي جداً نرجع نزعل بعض ! نهمل بعض ! طرف يبعت رساله للاخر أو يتصل والتاني يتجاهله و يطنش … فله … أصل الواجب خلص وجبرت علي كدا… طيب هو عيد الحب بنحتفل بيه ليه واحنا مش حاسين بيه … مش لازم أول نعرف يعني ايه حب قبل ما نعمله عيد ! هو الحب دبدوب وورد وسلسله انفتني بس ! هو إحنا عارفين يعني إيه حب أصلاً ! ليه متناقضين في حياتنا … بمعني …ممكن نهمل اللي بنحبهم … أو نحرجهم … وممكن نكسر خاطرهم… وبعد كل ده نحتفل بعيد الحب ! هو احنا بقينا حافظين مش فاهمين … ولا احنا فاهمين ومستعبطين ! مزهقناش من الروتنين والعصبيه … والضحك والخداع بإسم الحب؟! لكن مافيش انسان مطلق الشر ولا مطلق الخير ! النفس البشريه زهوقه … والحب فطره … يعني الانسان مولود ومعاه الحب والعاطفه والسلام النفسي! هو العيب في الدنيا ومشاكلها! ولا في كم الضربات اللي أخدناها في حياتنا ! ولا بسبب ظننا اللي خاب كتير! ولا يمكن يكون السبب في التكنولوجيا المخيفه … اللي قربت كل حاجه مننا ففقدنا طعم الحياه وبالتالي طعم الحب ! ما إحنا كنا زمان بنحب بعض ايه اللي حصل لينا! الحب مش محتاج عيد! الحب مش دبدوب وسلسله انفينتي! إحنا وصلنا لمرحله ان كل يوم الحب بيقل شويه بشويه …. وده خطر… لإن الحب هو أكسجين الحياه … ولو الأكسجين خلص هنموت إعرفوا ان اللي بيستحملكوا و يجرى وراكم رغم عدم اهتمامكوا دى مش قلة كرامه منهم … دا حب … وخوف من انكم تبعدوا عنهم خلو عيد الحب السنه دي بدايه جديده إننا نحب بعض ونخاف علي بعض … وإعرفوا أن الحب مش تسبيل ولا دبدوب ولا مقتصر علي ان يكون بين راجل وست الحب صفه أساسيه إنسانيه … دا مش كلام انشاء ولا كلام مثالي وخلاص إفرحوا … علشان الحياه قصيره معاكم أن كدا ميتين وكدا ميتين … لكن منخلهاش عيشه والسلام … النكد والكره بيقصروا العمر … عمركم بيتسرق … إفرحوا وإعرفوا إننا في الدنيا دي مجرد ضيوف لازم نلتزم بقواعد الأدب فيها لأننا فيها مجرد ضيوف … انتم عارفين ان معادلة الحب بتقول ان الحب = إحترام + إهتمام + تقدير … ياريت المعادله دي نمشيها علي كل اللي حوالينا سواء كانت أم .. أب … أخ… أخت … زوج … زوجه … الجيران … الناس اللي في الشارع … يالا نبدأ و نحب بعض